المدير الجديد

تركيزى  الزايد مع مدير إدارتنا الجديد  مخلينى مش فاهمة نفسي بصراحة .. هو انا مستغلساه بجد  ولا حباه وبتظاهر ادامهم انى مستغلساه ؟! فى البداية لما جه كنت فعلا مش مستلطفاه نهائيا بل و خايفة منه وحاسة ان المستقبل اللى مستنينا بعد ما مديرتنا الطيبة " اللى كانت ماشية جنب الحيط وطلعت معاش "  حيكون مريب.

والاحساس ده زاد عندي جدا لما إتأكدت انه ناوي يفركشنا ومش حيخلينا ا نفضل ف ال Teams  اللى بقالنا  سنين فيها مع بعض . وده سبب ليا إكتئاب شديد وشهور عياط ونفور منه لانى مش باخد على الناس الجديدة بسهولة وكان مؤلم ليا جدا ان الSupervisor بتاعي اللى بعتبره زي اخويا وبقالي خمس سنين شغالة معاه خلاص مبقاش تحتيه ويجيلى حد جديد اتعود على طريقته من الاول. وبعد كده بفترة حصل تحول فى مسار مشاعرى من ناحيته . بقيت بحب لما بيجتمع بينا ويشرح لينا حاجات جديدة مكناش نعرفها  وبحب لما بيهزر معايا وبحب لما بقول كلمة الفت بيها إنتباهه فيضحك .وبحب لما بيدافع عننا ادام الإدارات التانية لما بتيجي و تهاجمنا .

. بقيت مش بفهم نفسي لما بسمع صوته فى الكوريدور بيكلم حد من زمايلنا فاخرج اكنى بجيب ورق من على ال Printer  عشان يشوفنى ويصبح عليا. ببقى بعمل كده بس سؤال جوايا بيزن هو انا  بعمل كده ليه ؟ الراجل قد ابويا ومافيهوش اى لمحة جمال ...طب ايه مالى ؟!  ومؤخرا بقيت اشوف منه تصرفات بتغظنى جدا فى الشغل زي تأجيل قرارات او تهميش حاجات انا شايفاها مهمة ووضع حاجات تانية اقل اهمية على قائمة أولويتنا .وعدم معرفة اسباب كده الحقيقية .. بقيت اغتابه وابرطم عليه مع وزمايلنا عشان أجاريهم بس. لكن  ف نفس الوقت بفرح لما بشوفه او يسلم عليا وبعد تفكير عميق وتحليل لكثير من المواقف إكتشفت حاجة غريبة جدا ... إكتشفت انى لما بتبسط برؤيته مش بيكون لشخصه هو وإنما بشوف فيه يمكن صورة الاب الغايب عنى بقاله خمس سنين كده ...بتبسط لما بحس إن فيه ضهر حماية لينا ..لما بركز فى حلقته ولا بدلته ولا كلمة صباح الخير يا ياسمين اللى بيقولهالى دى ده .لإنى  مفتقدة انى اهزر مع حد كبير " راجل بالخصوص" لان ببساطة مبقاش فى حياتى لا اب ولا جد والعمام والخلان دول بعيدين كل البعد عننا ... إكتشفت انى مفقتدة القامة ... العقل الرزين والحكمة اللى ممكن كنت برجعلها فى اى وقت والاقيها فتحالى دراعها ...