" قال يعني القراية مقطعة بعضها ... بقى معقول كل دول بيجوا بس عشان القراية " تنهيدة حارة" امال الموكوس حسن ابنى مبيقدرش يقعد ساعة ع الكتاب ليه اكن الصفحات بتقرصه ..وكل سنة بدل الملحق ملحقين يلا اهو طالع فاشل لابوه .....لا وقال السنيورة طالبة ككاكو ... قال حبكت تطفحه وانا فاضل ع الشيفت بتاعى عشر دقايق وعايزة امشي ... هييح اكل العيش مر " انهت ام حسن برطمتها بمصمصة للشفاه وهي تغسل ما تبقى من فناجين القهوة المتسخة ، واسرحت بتحضيرالكاكاو للسنيورة ....
" مبرتحش غير فى المكان ده ... الحمدلله انه قريب للبيت .. منفذ حلو للهرب ... مبضطرش عشانه ادخل فى سين وجيم قبل وبعد الرجوع ..امي لما بتشوف الكتاب ولا الرواية ف ايدي بتتاكد انى مش نازلة ف معاد غرامي ولا حاجة واني بريئة ..
.نفسي اخلص الرواية اللي في ايدي وادخل على كتاب جلال الدين الرومي ... يااه الحمدلله الركن بتاعى فاضي ومحدش حواليه حقعد براحتى اشرب الكاكاو بانسجام ... فلتحيا الوحدة ويحيا السلام النفسي ....لا والواي فاي اشتغل لوحده بسهولة مش حعوز حاجة اكتر من كده ...بس نت ايه دلوقتى كفاية الزفت ده خلينيى استمتع بمنظر الكتب واخلص بقي ام الرواية الجملي اللي بقالها شهور ف ايدي. غريبة اوي الست صاحبة المكتبة هنا ليه قاصة شعرها علطول كده ؟؟ نفسي اروح واشكرها انها عملت مكان جميل وهادي زي ده بس بخاف من طريقتها الواقفة لتكسفنى زي ما حصل مرة قبل كده .
" راجعلى على ايرادات الشهر ده كويس يا شريف ومتنساش ترد على اللي كانوا باعتين نصوصهم عشان المسابقة ، بس اعمل حسابك مش حقدر اخد العدد ده كلهم اجل بقيتهم ل 2017 بقى ... اخذت نفسا من السيجارة وقالت ..عايزة اعمل Minimum charge للمشروبات هنا مش اقل من 20 للي حيقعد في منطقة الكافيه انت عارف الاستثمار مش بس في الكتب . الضغط بقي بزيادة و الشباب بتوع الجامعة بيعملوا دوشة فظيعة انا عايزة احافظ على جو المكان لو سمحت ...
" السؤال ده عليه 5 درجات بس يا شيري فاكس مش مهم "
" مش مهم ازاي ؟ ال 5 درجات دول يفرقوا كتير معاك يا بني "
" تعرفى انا بقيت بحب يكون عندنا امتحانات عشان نيجي نذاكر هنا سوا
وانا كمان والله يا ميدو المكان بقى ليه ذكريات حلوة معايا اوي
فكك من ام المذاكرة وتعالى نحكي ف اي حاجة فاكس المذاكرة كلها اصلا ..انا اتخنقت
بقلمي
ليست هناك تعليقات:
إرسال تعليق